陸羽仁 - 真係升到你唔信

美股連升兩天後，周一早段回吐，午後高盛報出好過預期的首季業績報告，銀行股強力反彈，帶動杜指止跌回升，僅微跌收市，港股昨日復活節長假後開市好有復活氣氛，在控(005)開高開推動下，恒指亦高開逾400點，午後內地A股止跌急升，恒指跟隨上漲，而且愈升愈有，收報15580點，勁升679點，為去年12月初以來最高收市位，全日最高15596點，最低15140點，恒指兩天累積升幅1106點。
期指收報15485點，升722點，比現貨低水95點。
國企指數突破9000點大關，收報9215點，大漲383點。大市交投非常活躍，成交754億元，係三個月以來最高。

造淡散戶焗住投降
昨日復活節假後開市，外圍美國ADR折合係15542點，比香港高640點，但期指開市時只在15000點上下浮沉，經紀張話大市「貨不對辦」，我叫佢咪制，雖然我唔係覺得個市一定會大升，但港股和ADR差咁大，大升大跌機會都有，短期市場較強，買升機會大少少。結果個市真係咁毒，先開得唔高，引班友出來插，但個市就反覆向上推，淡友在上午唔恨下心去打靶，結果就要在下午輸多500點才被迫打靶。經紀張話昨日下晝好多長期造淡的散戶，都頂唔順要舉手投降。
美股標普500指數上日已近今年1月8日的今年高位，而恒指今年高位是1月7日的15763點，表面上彈指可破，果然就去到一個「升到你唔信」的階段。港股向16000點進發時，就會令本來唔信個市好的淡友，都要改行變好友，大市再借勢急抽，就會去到位高勢危的水平。
中環茶友話，昨日個市向上飆，主要睇控表演，佢收市升9.3%，升到55.65元，比外圍上日ADR個53.71元仲要高，一隻控扯住個市向上，睇國企指數升4.5%，同大市升幅4.6%同步，但其他大股如中移動(941)只升2%，好多本地地產股都唔係升得咁勁，開始有少少跟唔上之勢。
茶友話，控供股包銷商高盛，在本月初出報告，話將控目標價由41元改到55元，昨日控果然升到此水平樓上，唔知係高盛眼光好定功夫好，總之一講就中，唔到你唔服。
今個升浪主要係炒美國金融股反彈，除了豐外，同一時間大插之保險股宏利(945)，昨日亦勁升一成幾，重上120元水平，宏利上個月控供股前，股價連日大插，三兩手勢插到去55.3元，相差不夠一個月反彈一倍，幅度可以話非常驚人，主要原因係市場當時擔心金融海嘯會進一步衝到去保險業，令宏利面臨強拋售，跟住美國接連由聯儲局主席伯南克直升機掟銀紙救市，跟住到財長蓋特納推出公私合作買毒債，再加放寬金融資產市值入帳三招，令到美國金融危機暫時脫險。
二三線陸續開車
中環茶友話，除了係宏觀財金政策，美國收緊沽空，亦係促成金融股反彈的重要因素，本來華爾街容許「裸沽」，即係無貨都可以沽空，對沖基金只要看淡股份前景，就可以無限制咁拋空獲利，金融係信心先行的行業，咁樣沽法就算係鐵股都死，美國眼見勢色唔對，於是提出限制沽空，有了呢個技術性限制，好多做淡倉的對沖基金為減低被夾風險，都寧願平一平倉，形成金融股出現強勁反彈。
中資金融股方面，「三保六行」亦全線上升，國壽(2628)升1.3%，平保(2318)上周四公佈業績後高漲7.7%，大摩把目標價從40.11港元上調至51.90港元，維持中性評級，昨日再升1.6%。招商銀行(3968)公佈按中國會計準則業績，截至08年12底止全年業績，純利為210億元(人民幣，下同)，較07年同期152億元增長38%，每股盈利1.43元，業績好帶動昨日股價受追捧，一度高見15.84元，收報15.72元，升8.
7%。招行係好股，雖然唔係最大，但係勝在經營手法較商業化，可惜現價貴。
在升浪持續一段時間後，二、三線陸續開車，其他股份方面，旺旺(151)發TDR，股價升7%；上海集優(2345)全年多賺7%，股價漲20%；重慶機電(2722)升15%、中國仁濟醫療(648)升36%、儀徵化纖(1033)升18%。