4月5日，周日。資本主義制度鼓勵競爭，因此令市場充滿活力同時又極唔穩定，充滿驚險及戲劇性改變，往往令一般人措手不及；D boom & bust及創造中破壞，既可令人發達亦可令人破產。呢次反彈一如我老曹估計，由3月9日開始並已出現連續三周上升，估計今個月份內仍可上升，但唔係牛市開始。請利用阿里士多德「滲透分析法」去獲利，即係由小部分大升股份逐步擴散到較多股份加入上升行列潮。
A股回跌港股反彈完
3月9日至31日標普五百指數上升18%，係1982年以來升幅最大十六個交易天。成個3月份標普五百指數升8.5%，係2002年10月以來升幅最大一個月。到底係熊市二期第二次反彈，定係牛市一期開始？1994年長期資金管理公司出事，事後證明係投資股票好時機；今年3月花旗、美銀和控（005）等跌幅咁大，3月9日係另一次入市好時機；加上4月1日傳出美國財務會計準則委員會（FASB）美國國會要求下，變相改為「mark-to-model」，令2009年度金融股面對資產負債表壓力可減少。呢個決定令銀行股盤數好睇D，但唔代表問題已解決；短期可刺激銀行股價上升，但中長期一D作用都冇。如經濟短期復甦反令人擔心未來出現「Double Dip」，因為經此一役，銀行業已大不如前。諾貝爾經濟學獎得主斯蒂格利茨認為，家政府挽救銀行計劃係要納稅人付出代價！總結係win-win-lose遊戲，即銀行及投資者贏，但納稅人輸。政府為有毒資產提供92％貸款；投資者與政府再各出4％。贏大家佔一半（50％）利潤；輸96％由政府負擔（如毒資產價值跌至零）。
有毒資產計劃刺激下，3月27日恒指已見14257點，升幅達25.67%完成浪A，進入調整浪B，然後再開始浪C。浪A曾升穿50天線阻力，至於未來浪C能否接近200天線阻力區（16000點）？木宰羊。恒指經過1月7日至3月9日由15763點回落到11344點後，政府再膨脹（Reflationary policies）政策下，股市由3月9日又回升，呢次表現最出色股市係內地A股，成為「領先」股市及帶動本港大部分國企紅籌股上升。請留意A股，如果A股止升回跌，代表港股反彈快完成。熊市二期反彈快且急，由惡性拋售完成所引發，往往可短期帶50％至100％利潤。上周末G20結果證明新興市場逐漸強大，「世界新秩序」建立緊；G20批准動用1.1萬億美元去對抗世界衰退，短期可刺激新興市場股市進一步上升。
Kenneth Mertz係Forward Banking and Finance Fund經理，建議大家吸納中小型銀行股。拉斯維加斯金沙CEO3月27日至30日共購入二千三百萬股金沙；金沙股價由一年前83美元回落到3月9日1.38美元，上周已重返4美元，由低位計升幅超過280%，證明熊市二期充滿Double your money機會。美林證券認為，必和必拓（全球最大礦務公司）3月份發行63億美元債券目的係收購鉀鹼類或石油類資產，認為資源股今年第二季極之吸引。去年12月當油價跌穿每桶40美元時，相信已超賣；到3月底油價重見55美元先出現獲利回吐，我老曹認為，4月份每次油價低於50美元可吸納石油股，直到油價重返60美元之上獲利回吐。支持呢個睇法背後係期油價格曲線出現陡峭的交易延期費（contango）；由3月份開始建議各位收集石油股作中線投資用。本周開始係美股業績公布期，未來個別股份受業績公布而作調整；所有市場皆擺脫唔到循環，你能掌握各行各業盛衰循環周期嗎?!例如呢次資源股上升周期。
工業股回升
物價上升（CPI）我地叫做通脹；相反，樓價上升及股價上升我地叫牛市，下跌便叫熊市。但有時候出現物價上升同時樓價和股價下跌，呢段日子我地叫做水深火熱期。1973至1974年曾出現過一次。家大部分港人唔係忘記，就係因為太後生而冇經歷過。同樣情況今年又再出現，去年12月至家銅價已上升40%、油價升50%及CRB指數已升14%，代表未來物價又再次進入上升周期。連商品貨幣亦再次進入上升軌，我地再次進入水深火熱期。值得注意係上周起工業股有止跌回升象。
聯儲局把利率降至0.25厘後，美元已冇再減息空間，美國三星期前推出量化寬鬆貨幣政策，美國政府及聯儲局挽救計劃金額已接近12.8萬億美元（接近美國2008年GDP 14.2萬億美元水平），其中包括1萬億美元畀Public Private Investment Programs去幫助美資銀行內呆壞賬，恢復美國最大十二間銀行重新貸款能力；另5000億美元畀FDIC去擔保Term Asset Backed Lending Facility2萬億美元債務及所有美資銀行內存款。呢個情況為股市提供「Trading」環境而唔係2003年「買入後可持有四年」低位。Double your money in this trading season（趁低買入，例如恒指接近11000點；趁高賣出，例如每次恒指接近200天移動平均線）。Monetary Inflation由今年3月份開始，年底前美國負債將超過60萬億美元，由於美元係世界儲備貨幣，令美國新增美元被各國央行吸收；加上信貸收縮所產生通縮壓力，令未來世界經濟陷入水深火熱中，變相把美元價壓低及資金直接注入經濟體系；根據普通貨幣理論，呢種做法可令通脹率回升及企業又再借錢投資，經濟可重新繁榮起來。過去三周令美元兌歐羅回落6.3％，例如歐洲央行亦開始量化寬鬆政策，可能真係重燃全球通脹壓力；不過，歐洲央行拒絕咁做，只宣布減息0.25厘；反而中國人行卻較美國早一步咁做，呢個係近月全球原材料價格上升理由。
Fitch Ratings公司3月31日認為今年全球GDP下降2.7%，但明年GDP恢復上升，因為受近日貨幣政策刺激所致。同1929年唔同係當年股市大跌後政府抽緊銀根；加上金本位制誇大環球通縮壓力。呢次全球政府股市大跌後皆放寬銀根，雖然美國今年GDP 可能回落3.4%（係和平時期最大跌幅），但金磚四國今年GDP仍可上升3.2%；德國同日本將面對OECD國家中GDP最大跌幅，估計可達3.7%及6.7%，今年首季日圓回落8.3%，日本銀行「短觀報告」公布3月份大生產商情緒指數係-58（去年12月-24）較1975年5月-57更低，日本情況對東南亞國家有一定影響。但唔排除A股市場去年10月見底及美股今年3月見底可能性。
貨幣「三分天下」
3月9日起反彈市同去年11月次唔同，呢次周期性及增長股表現較防守性股出色，有D「見底」味道，但客觀形勢仍未配合，例如OECD國家失業率仍在上升及環球化趨勢在退潮中（保護主義抬頭）。所以3月9日係熊市反彈機會大於牛市一期。上一次環球化趨勢由1870年開始，到1914年結束共四十四年。3月30日中國同阿根廷達成協議，日後可以人民幣結算貿易，呢個係第五個國家同意以「人民幣」結算貿易（其他係南韓、馬來西亞、印尼及白俄羅斯），中國政府開始把人民幣國際化，並G20中爭取領導權。國際金融界認為，世界銀行請一位中國人（本報前撰稿人林毅夫）做首席經濟學家後，IMF將邀請另一位中國人出任首席經濟學家，令中國國際貨幣體系上影響力逐漸上升。最近人行行長周小川建議成立一個超主權儲備貨幣，雖然美國總統奧巴馬立即回應話冇必要。呢次係中國政府首次國際舞台上挑戰美元地位。分析界估計，八年後貨幣將出現「三分天下」局面，即美元區、歐羅區及人民幣區。呢個國際貨幣體系改造符合世界上大多數人利益。截至今年1月止，全球資本市場及房地產損失80萬億至100萬億美元，造成未來三至五年內全球金融體內流動性嚴重失衡。如果人民幣可迅速成為國際儲備，正好填補上述不足，形成現代版「特洛伊木馬」式國際金融互動，畀美國有時間修補自身經濟。當然美國政府係唔會輕易畀人民幣成為國際第三種儲備貨幣，未來八年美國、歐羅及人民幣之間互動與整合，將繼續引發國際間金融動盪。
未來八年人民幣將逐步進入國際市場，例如達成大型貨幣互換協議，以人民幣發行國際債券或作為外國央行儲備貨幣等。未來三至五年中國必須開放資本項目結售及八年後完全開放，才能把人民幣推上國際貨幣地位，同時令上海成為國際金融中心。
近期中國政府一連串行動可睇到佢地決心令人民幣登上國際貨幣舞台：A New World Order正在建立中，美元一如1900年英鎊，地位正下跌中。上海中央支持下，開始建立國際金融中心地位，並以中國人固有量入為出為消費觀念。按「風險可控、成本可算、資訊充分披露」為原則，展開國際金融產品新一頁，令上海成為國際「有源之水、有本之木」，以抗衡西方經濟過去脫離實體，以及強調虛擬經濟所帶來災難（即家面對去槓桿化）。中國政府提出上海作為國際金融中心目的係歐美自顧不暇時提供另一融資渠道，化金融海嘯之危為機，並已獲全國人大常委會支持；中國開始改造全球舊金融秩序，建立新金融體系平台，發揮中國對全球金融影響力。對中國人講既係機遇亦係使命。呢次周小川講話係有備而發；上海遲早成為新資本主義制度下國際金融中心。新華網3月31日公布「中國證監會首次公開發行股票並在創業版上市管理暫行辦法」5月1日實施。即5月1日起內地開始接受創業版IPO（香港創業版並唔成功）。
國際金融中心不斷改變，例如1800年阿姆斯特丹、然後到布魯塞爾、倫敦甚至蘇黎世（第二次世界大戰期間）；戰後法蘭克福和紐約；石油危機後東京；1990年後加入香港同新加坡。上海成為另一國際金融中心一D都唔奇，歷史話畀我地知，所有國際金融中心地位好少能維持超過二百年（家以倫敦最長，但英鎊地位自1931年起走下坡亦令紐約地位上升；美元地位自1971年起走下坡，令東京地位曾一度冒起）。
湯遜路透調查上周分析員對標普五百指數今年首季純利估計係下降35.6%（上周34.9%）；最差係耐用性消費品（負102%）、原材料（負58%）、能源（負36%）、工業（負28%）、電訊服務（負22%）、科技（負21%）及健康護理（負3%）。以今年估計純利計，現水平O十三點六倍，即仍處熊市二期P/E。
沒有留言:
張貼留言