陸羽仁 - 撈底記得定止蝕

美銀業績外強中乾，重燃投資者對金融業前景的憂慮，銀行股被恐慌性拋售，美股杜指上日勁挫近300點，扭轉連續六個星期的升勢，日本股市昨日走低，A股滬指低開，恒指跟隨外圍裂口低開685點，亦係全日最低位，其後在低位徘徊，恒指收報15285點，大跌465點。期指收15237，跌447點，比現貨低水49點，成交85846張。國企指數開市跌穿9000點關口，尾市跟隨大市跌幅收窄，9000點失而復得，收報9039點，下挫191點，跑贏大市。紅籌指數下瀉134點或3.9%，收報3298點。大市成交575億元，與上日相若。

昨日的跌市元兇係兩隻重磅股大笨象控(005)同中移動(941)，兩股齊挫5%，拖低恒指近430點，成交近65億元，佔大市總成交的11.3%。美國銀行第一季度業績報告雖然賺錢高過市場預期，但係收益全靠一次性特殊買賣所致，實質業務卻有惡化跡象，令金融股捱沽，成為全球跌市重災區，控開市曾跌見51.45元，大跌6.4%，午後跌幅略為收窄至52.15元。

股市走在預 期之前
黃金再度成為風險避難所，金價每盎司上升20美元，紫金(2899)先升後回，午後升幅收窄至0.2%，而招金(1818)升8.5%，而全球最大的黃金上市交易基金SPDR金ETF(2840)上升2.6%至680元。
美國金融股業績大幅改善，好多人半信半疑，覺得「假假」，認為盤數靚好大程度係因為放寬會計入帳方式，投資毋須以市值入帳，所以就算美銀盤數靚，但不代表金融業問題過去，所以美銀宣佈業績雖然不俗，股價反而趁好消息插低。?家市場焦點開始轉移去大銀行壓力測試的結果，有消息話結果顯示大部份主要銀行盤數仲係好唔掂，所以政府都唔敢公佈結果住，要諗掂點樣拆彈先至揭盅。市場流傳版本係政府會將借俾銀行的貸款變做股本，咁樣可以直接強化銀行實力，同時又減低再向國會伸手的機會，但市場就憂慮一旦政府換股，會大大沖淡現有股東的權益，令到美國金融股碌低。
中環茶友話，股市走實體經濟之前，呢個道理好多人已經知，但在資訊爆炸的今日，股市另一個特色，係走在大部份人期望之前，即係好消息前要入貨，證實要出貨，咁樣先可以係股價未反映市場期望前先人一步採取行動。
茶友用番美國金融股做例子，三月份大部份市場人士仲係驚緊金融海嘯會有第二波，但當美國聯儲局決定用直升機掟銀紙後，醒目資金開始進場博反彈，當大部份銀行股出現幾成以至幾倍升幅後，銀行業績好已變成普遍預期，再無令人驚喜的地方，所以美銀公佈業績，無論好壞，股價都註定只有一個方向，就係向下，所以話美銀業績有阻憂，又或者話盤數有粉飾成份，只係為調整找來一個藉口而已。

好天斬埋落 雨柴
美股調整，港股亦出現好多人等待回落，究竟呢個係咪低吸機會呢？好多人答案都會話係，所以指數低開後，低位有買盤出現，令指數守住係15,200點樓上。茶友話港股後市點走，當然要睇美股是否已經見頂，但正常情況，就算個市見頂，應該都不會直線回落，多數係沉浮，上上落落，所以撈底短炒者，最緊要係留定止蝕位，先博反彈向上炒，一旦跌破止蝕位就打靶。係熊市玩反彈，重點唔係睇得準唔準每個波幅，而係可唔可以按部署行事。
收市後，大新銀行(2356)宣佈以5.55至5.7元配股，集資3億元，配股價較昨日收市價有13%折讓，以集資金額計，折讓超過一成，銀行願意以呢個價錢配股，反映管理層都想趁市場氣氛好轉加強股本。
大新銀行去年為所持美國華互銀行債券，以及外方管理金融資產減值6.55億元，現時外方管理金融資產包括結構性投資工具等，已減值至1.46億元。為了應付投資虧損，大新銀行集團經大新金融集團去年注入10億元資本金後，合併核心資本充足比率及總資本充足比率按備考基礎計算，已分別增加至8.1%及15.2%，有需要增加股本，現在趁大市轉穩就立即郁手，一於好天斬埋落雨柴，類似集資短期會好多，其中尤以銀行同內房股機會最大，如果買中遇配股，可能就會吃眼前虧。