5月17日，周日。我老曹係逆市思維者，亦係經濟周期信徒。美國經過二十六年瘋狂借貸後出現CDO危機；加上戰後嬰兒潮進入退休年齡，相信2007年10月起係美股逆轉期，投資期結束，買賣期開始。自今年3月9日迄今股市大升51％後，5月11日開始又係另一次資產配置（Asset Allocation）日子，即減少高風險項目，轉投低風險項目例如外幣存款、黃金；股票進入減持期。趨勢仍未清晰，但睇睇那些金絲雀（礦坑中最先死亡係金絲雀）已開始死亡，升市Ａ股帶頭，跌市納指先行。5月11日起應採用保守先行策略，主因係美國消費者病了。去年11月起股市進入均衡點—即好淡因素各佔一半；當投資者強調利好因素時，股市可上升45％；當投資者對利淡因素恐慌時，股市又可回落30％。5月11日起D從3月9日開始入貨trader又獲利回吐。
散戶喜歡高追低沽
大部分投資者皆喜歡做群眾一分子，而唔肯遠離群眾。唔少人3月初沽貨，5月又入貨。佢地習慣股市短期見底前沽貨，以及股市短期見頂前入貨。
油價由2月份32美元一桶升至60美元，升幅85％。雖然油價重返60美元一桶，但IEA估計，2009年需求減少二百六十萬桶一天，降幅創紀錄，為2007年以來新低。以上述估計睇，油價反彈應完成。糖已升至三年高位，小麥更出現新高位，錫亦出現六個月內新高。標普高盛商品指數今年至今已上升20％。原材料價格大升而工業產品價格唔升，進一步壓縮生產商利潤（如果仍然有話）。分析員指出，近期商品價格上升並非因需求上升，而係資金流向造成，與對沖基金、大機構投資者將資金投入商品市場炒起有關，理由係奧巴馬上台後言論一直不利美元價！中國過去六個月一直國際市場大買原材料，但中國出口一直好唔起來。如經濟一直無法好起來，擔心過去六個月原材料漲價好快告一段落，因為至今為止所謂「經濟復蘇」仍然係投資界一廂情願諗法，缺乏有力數據支持。美國工業生產連跌六個月，已跌至1998年以來最低；ISM指數連跌七個月；工廠使用率係1967年以來最低。
格蛇認為美國樓價見底，但以S&P ∕ Case-Shiller住房指數1997至2006年美國樓價共上升三倍，依家只調整26％，相信仍未足夠。1966至1976年滯脹引致1978至1982年高利率時代，然後進入利率回落期及信貸膨脹期；到2006至2009年信貸膨脹期結束，利率回落期完成。十年期債券息率已見3.36厘（或穿200天移動平均線），代表美元再次進入利率上升期！貝爾斯登事件後，美國進入資產負債表收縮期（政府除外），一旦美債唔再吃香，將連政府資產負債表亦面臨收縮。根據RealtyTrac數字，4月份被接管住宅量三十四萬二千間（即每三百七十四個家庭有一個冇屋住），2007年8月至今只接管一百三十萬間，未來情況恐怕冇咁理想。
銅價已回落10％，油價亦由60美元跌至57美元，係咪熊市反彈完成?!由去年11月開始「奧巴馬反彈」隨時結束，因為股市上升，經濟卻在惡化，上述情況唔可能長存。
3月份美國因增加石油入口而令貿赤擴大。油價一如事前估計，上周已見60美元一桶，同時令石油股股價大升。我老曹3月份推介江西銅業（358）之後，4月份則建議大家買石油股，應該又賺到唔少（邊個話熊市中冇賺錢機會？）。但各位唔好忘記，2007年10月至今美國人物業市場及股票市場虧損最高潮達20萬億至23萬億美元，依家手上財富淨值已少於30萬億美元，2009年佢地再唔係2007年10月前咁富有。
中國4月份工業生產上升7.3％（3月份升8.3％），較事前估計上升8.6％為弱；零售升14.8％（3月份升14.7％），較估計中上升14.5％強；4月出口減少22.6％。中國經濟情況亦未許樂觀。
2008年諾貝爾經濟學獎得主、美國普林斯頓大學教授克魯明上周北京表示，美國儲蓄率將繼續上升至佔總收入8％左右，未來美國消費需求會放緩。世界唔可能回到2007年10月危機爆發前種模式——美國人透過加按房屋透支現金過活，未來錢大部分來自中國內地、日本、台灣、香港等亞洲地區。自危機爆發後，美國人儲蓄率由0％上升到4％，相信會繼續上升到佔總收入8％，係美國過去歷史水平。
儲蓄率上升大前提下，美國消費需求放緩乃必然之事。
克魯明認為，未來三年係中國經濟關鍵時刻，能否由出口拉動型經濟轉為內需拉動型，將決定末來中國經濟情況。但有一點可以肯定，中國已唔可能再依賴出口去拉動下一次經濟復蘇也。
至於低息威力？美國曾出現兩次低利率期，上一次係1930年代大蕭條期，另一次就係2009年。相信今次唔會重演1930年代大蕭條，但似乎進入1990年代日本情況，即唔會進一步下滑，但復蘇卻有困難。今年第一季日本GDP下滑16％（2008年第四季下滑12.1％），係戰後最差，主因係日本出口貨滯銷，令出口下滑26.8％。日本首相已提出15.4萬億日圓刺激方案（1600億美元），希望刺激本土消費信心。
1982年8月開始全球信貸膨脹期到2007年10月結束。整個世界金融業進入去槓桿化時段，傳統投資技巧例如價值投資法、買入後長期持有已不管用。漫長去槓桿化過程中，股市只有進入極度偏低才可入市吸納，股價一旦重返正常水平便獲利回吐。我老曹2008年11月及2009年3月主張入市，2009年1月6日及5月20日前則建議獲利回吐。CDO危機有如「情花毒」，耐唔耐便發作一次，每次皆依賴政府注資挽救才能脫險境。一旦股市回升，好快又再次進入流動性陷阱（Liquidity Trap）；由於利好消息及利淡消息同時存在，分別只幾時利用D消息作為炒上炒落理由。
今天美國家庭負債相等於GDP 96％（1982年係47％），2009年無論歐洲或美國銀行卻須繼續為手上資產進一步撥備，因不履行還款協議比率仍在上升。
2008∕09年度美國上半年稅收較對上年度減少14％，而開支卻急升，政府正急於發行2萬億美元債券（相當於GDP 15％）。今天美國政府負債百分比漸漸接近90年代日本政府水平，即日式衰退美國重演機會十分大。佳士拿已申請第十一章；通用汽車獲注資135億美元後如無法扭轉局勢，6月1日可能面對相同命運。到時美國可能只留下福特汽車（2009年第一季虧損18億美元，仍有210億美元現金，有能力生存多一年）。如佳士拿及通用汽車破產，福特有條件恢復獲利。長達三十年（1978年開始）環球化（Globalization）進程亦進入結束篇，2008年貨櫃船載貨量減少20％，去年4月開始美元上升周期到今年2月亦結束。美債（三十年期）息率接近5厘，而自1994年起美債（三十年期）息率從未超過5厘。標普五百指數由3月9日至5月15日回升37％，上述升幅係建基於假設美國樓價進入穩定期。上周標普五百指數已進入阻力區，銀行股指數亦完成大反彈，只有金屬股指數及石油股指數仲有一DD上升空間（但距離阻力區亦不遠矣）。
金價有機會上望1000美元 1999年5月7日英國財政部宣布出售黃金儲備後，澳洲、瑞士、荷蘭等國家亦將黃金推出市場，令金價自2001年跌至252美元後一路上升，更一度打破1000美元，因新興國家央行紛紛購買黃金，尤其係中國同俄羅斯。
過去十年歐洲銀行共售出三千八百噸黃金，收回560億美元，賬面損失達400億美元。中國2003年至今共購入四百五十四噸，六年內上升一倍，成為世界上第五大黃金儲備國，不過只佔外儲備1.6％（世界平均水平10.5％），相信仍會繼續購買。美元弱勢下，金價有機會上望1000美元。
過去八星期約有58億美元流入亞洲地區（2007年11月有2428億美元流走），係近十三個月以來最大資金流入，引發港股自今年3月9日起有45％升幅，甚至細價股及中價股亦加入上升行列，其中又以中國ETF受惠最大。3月18日聯儲局宣布將動用3000億美元買長期國債，但三十年期國債指數卻由3月18日至今回落，可能重見去年11月低點（112.5）。
湯森路透向投資界調查今年第一季標普五百純利預測：上周係負36.3％（對上一周係負35.1％），即繼續向下調。
價值股最大缺點就係熊市開始不久，便會有人認為十分「抵買」而吸納，甚至畢非德亦受唔住引誘而入市吸納價值股，結果損失不菲。2007年10月開始，美國價值投資法信徒2008年無論乜價位吸入AIG、通用電氣、花旗銀行或其他股份作長期持有，2009年皆損失慘重，因為股票市場由2007年10月開始從「投資者」市場進入「買賣者」市場。嚴格D講，由2007年10月起股票市場再冇長線投資對象，只提供短線買賣機會。唔同行業有如十五隻吊桶，七上八落。例如今年3月9日有線電視台股市評論員青姐流淚時，你有冇入貨？最近有人高唱恒指睇20000點，你又點做？所謂經濟復蘇論，早去年5月已開始有人講，至今已講一周年……。作為趨勢投資者，永遠唔會猜測何時見頂及何時見底，因為佢地早已知道：人類係冇預測能力。
應鎖定部分利潤
1930年道指亦曾出現過52％幅度反彈，但到1932年美股才見底，總跌幅達89％。熊市中大部分時間反彈幅度可由19％至39％【圖】，最高可達67％，各位請唔好將反彈市說成熊市結束。2007年10月至2008年10月係股市Liquidation期，拋售股票係為套現，此乃熊市一期。2008年11月起進入評估股票價值期，形成個別股份有升有降。D2008年10月前被保留下來現金，都呢段時間入市。唔少人因相信牛市已開始，而將所有資金投入股市；不過，實質經濟仍在惡化中。股市又再次進入阻力區，股票吸引力迅速下降，大部分原材料價格已完成反彈，相信好快又再次回落。我老曹認為，投資者5月20日前最好鎖定部分利潤。
兩星期前我老曹接受milk雜誌訪問（代表年輕一代雜誌），該雜誌記者認為我地呢一代（戰後嬰兒一代）佔去香港一切美好東西，而令佢地X一代對未來期望變得暗淡及灰心。如此充滿怨氣結論都幾有趣。我地不妨睇睇南韓年輕一代，佢地充滿創意；再睇番香港年輕一代，唔少卻變成電車男或御宅女。我老曹請香港X一代年輕人開拓你們新天地，只有創意才可改變未來，而非抱怨。何況今天阻礙年輕一代上位唔係我地呢一代（戰後嬰兒），而係中國人家族觀念。
香港企業最基本單位係「家族企業」。中國人經營企業，凡事以「家」為重，家長企業中地位接近不可挑戰，經常以家規、家法取代企業管理；加上親疏有別人際關係，即家人關係、熟人關係及生人關係三大規範；家人待遇最好、熟人次之、生人更次之。往往將家族利益凌駕於企業利益之上。咁情況下，非家族成員又點會忠心於企業？唔少企業所有重要職位幾乎全由家族成員佔據，令真正有用人才好難進入內部核心階層，形成人治企業。大家企業內重感情、親情、人情，輕正義、公理、原則。所以中國企業大部分都大不了，因為冇健全制度，亦不太講法制，所謂股東會、董事會、監事會，人治下根本上無法發生作用，往往變成個人主導（即主席話事）；再加上「子承父業」乃必然趨勢，影響企業與員工關係，繼而降低員工積極性。當創業一代漸由核心層退出來由第二代接手，問題便浮現。1997年香港經濟停滯不前，家族企業係最大原因，而唔係我地呢一代（戰後嬰兒）阻住Ｘ一代上位。事實上，係中國人家族觀念令Ｘ一代無法憑實力獲得重用而怨聲載道。
沒有留言:
張貼留言