陸羽仁 - 經濟發軟蹄

經濟發軟蹄
美股上周五無乜大事，杜指微跌62點，收8268點。不過港股在美國的預託證券就跌多，折合收市價為16482點，跌308點，可能和香港公布極為差勁的首季GDP大跌7.8%有關。
財爺曾俊華上周五開記者會，公佈首季經濟的嚇人數字，首季GDP大跌7.8%，同佢在二月宣讀財政預算案時，預測首季負增長2.6%相去甚遠。唔好講財爺睇錯市，即使街外經濟學者到政府公佈消息前的估計，好多都係估跌4至5%，無人咁叻估到係跌7.8%咁多。曾俊華事後解話，話「外圍環境惡化遠超想像！變化大家估都估唔到。」
香港獅城難兄難弟
香港經濟一季跌7.8%咁多，已是98年以來最差，98年金融風暴令第三季跌8.1%，今次暫時未破到呢個紀錄，亦希望唔好破到紀錄。香港經濟呢一次令人跌眼鏡式的急跌，主要由出口大跌所致，香港第一季出口急跌22.7%，係GDP急挫的元兇；睇番區內其他四小龍地區，情況和香港相近，已公布首季數字的有新加坡和南韓，新加坡慘過香港，首季經濟跌11.5%，出口跌30.6%；南韓情況較好，減息及政府刺激經濟措施收到效果，首季只跌4.3%，出口跌24.9%。
香港首季經濟比預期差，雖然已成過去，但最大影響是我們要相應調低全年經濟的估計，財爺二月公佈預算案時估計今年全年經濟跌2至3%，如今肯定無法做到，所以佢要調低全年經濟預測至負5.5至6.5%，直追九八年亞洲金融風暴時GDP跌6%的數字。新加坡估計今年全年經濟跌6至9%，佢同香港都可謂難兄難弟啦。
好多香港人唔覺得依家經濟咁差，例如去酒樓食飯仲經常要排隊，最常見的反應係話「乜唔係金融海嘯咩，點解仲要等位？」依家同03年沙士時候比較，感覺好有幾個原因，第一，沙士的衝擊急勁而短暫，高峰期有一兩個月市民根本唔敢出街，酒樓無晒客，所以肉眼睇落感覺好差，但03年沙士時最差第二季香港經濟亦只係跌0.9%，全年經濟還有3%增長，基本上還是在01年科網股爆破潮後的復甦中，經濟本質唔差。但如今金融海嘯的衝擊漫長而深遠，自去年第四季開始急跌，如今大跌兩季未見會跌完，深度比沙士大得多，直逼98年的亞洲金融風暴。
經濟衝擊慘過沙士
第二，今次的衝擊是在核心的出口業，對經濟影響好大，市民又唔係太覺，03年沙士期間零售業好差，但出口無大影響，全年出口還有14%增長，03年係睇落差實際唔太差，如今係睇落唔差實際差。
第三，失業未到高峰，如今公司節流仍是以減薪為主，裁員情況不及98年，甚至03年時那麼厲害，打工仔如今保住份工可以繼續消費。03年除了消費零售行業大裁員之外，最大鑊的是公務員和公營機構全部要減人工，香港公務員加食皇糧的打工仔有30幾萬人，計埋屋企人有過百萬，咁大批人俾政府一刀斬落去，自然十分痛，對消費亦有影響，今次政府頂住唔減公務員人工，有助維持消費信心。
第四，股市、樓市反彈，自股市3月大跌後急彈，樓市都跟住彈，投資市場一好，市民感覺就會好。
小心來個W形反彈
總括而言，雖然現時表面睇經濟唔係咁差，但其發軟蹄的程度，比想像中嚴重，咁都唔緊要，問題係仲要衰幾耐先至完。
睇過去香港經濟的表現，在大插後好多時有V形反彈，98年金融海嘯在第三季見負8.1%的低位，第四季開始改善，跌幅收窄至負6.5%，接來一個V形反彈，直升到2000年。03年的沙士也是在第二季急跌到負0.9%的低位，跟住就一個小V形咁彈番上來，今次又如何呢？
我睇第二季的數字，現時睇出口仍無大改善，雖然美國存貨大減令定單重現，但主要係大廠受惠，中小型廠仍在水深火熱中。私人消費開支跌幅有放緩跡象，投資市場反彈有利消費。但人類豬流感的壞影響開始浮現，爆疫後旅遊業、航空業最受影響，5月頭半個月出境和入境團旅客，分別大跌50%和70%，情況比沙士時更差(你話國泰航空點會好)。總的來說次季的GDP跌幅即使收窄，亦不會有大改善。
照目前的情況估計，本地經濟跌到今年第二季、第三季都未完，由於去年第四季經濟已經開始大跌，去年的基數較低，所以今年第四季的GDP和去年比較時，數字有機會較好，但若能持平都已經要偷笑。特別是失業情況會持續惡化，對經濟有壓力。
政府估首季經濟跌晒眼鏡，陸羽仁專門找政府高官問，有高官話外圍環境惡化的情況遠遠超過想像，政府在年初預備財政預算案的預測數字時，估唔到首季出口會跌22.7%咁多，遇上這場百年一遇的金融海嘯，無一個政府可以作準確評估，各地政府都只能不斷地調低經濟預測。
高官又話，另一樣估唔到的是股市大升，港股在上周一升至17685點，亦係出人意表，主要係熱錢流入炒作所致，如今銀行結餘加埋金管局發票據吸納資金，累計已有3000幾億流入香港，呢個現象亦非香港獨有，資金同樣流入亞洲其他地區。
資金市好難估佢會點發展，但政府擔心一旦資金流走時，股市會再下插，特別係升市同香港經濟基本情況完全唔匹配時，更令人擔心。
影響樓市大過股市
經濟數據出乎意外地壞，對樓市的影響大過股市，一則股市大反彈主要源於熱錢買貨，熱錢未走時唔會大跌，二則香港股市內有眾多紅色股，佢唔受本地經濟影響(但對本地地產股、零售股和銀行股就有影響)。樓市就唔同，熱錢流入並無投入樓市，依家主要係本地人買樓，而且樓市同本地經濟同步，經濟唔好，樓市亦好難好好景。
出現首季跌7.8%的數字後，政府的回應是會增加派糖，減輕市民的痛楚。派糖唔係唔好，起碼市民收到粒糖仔食，都好過無，但派糖無助於改善經濟，以香港這種外向型經濟為例，本地消費佔經濟比例太少，派糖令消費感覺好少少，都唔等於經濟會好，所以香港主要等外圍，主要是等歐美復甦，才可以帶動番香港的出口。問題係歐洲的大鑊未爆完，美國的復甦即使到來，亦都會好少好慢，並不是V形大反彈那一隻，而係似L形多，所以香港出口業的前景甚為可慮，小心今次下跌的深度遠超03年沙士，直撲98年金融風暴那種跌幅，但康復的情況卻可能不比98年，不是V形反彈復甦，而係有可能係W形，即係彈完仲會腳軟。
如果出現弱V形，甚至W形的走勢，失業率未跌定，今年起碼要見一見6、7%的失業率，甚至更多，市民在擔憂失業的前提下，買樓的意願會進一步下降，不利樓市復甦。過去都有經驗，當股市逐步好轉後，樓市還在尋底。