陸羽仁 - 美國經濟「復甦」？

美國上周公布四月份零售銷售數據，結果繼3月份下滑1.3%後，4月再跌0.4%，扣除汽車銷售部分，則下跌0.5%，遠差過市場預期的增長0.5%至1%。
美 國零售銷售下跌的原因是職位流失、房屋價格下跌和家庭財富稅減，令消費者的消費能力大降，而銀行削信用卡額度也是消費減少的主因。
零售數據兩連跌
我的美國朋友話，早一兩個月幾家銀行先後打電話叫佢削信用卡額度，有一家話你有張信用卡有1萬美元額度，但你成年都無用過，不如削佢。另一家又話你張信用卡有1萬5000美元額度，但你經常只用到3000美元左右，不如將你個額降到3000美元。
銀行狠削信用額
我個朋友係公司高層，信用良好，到期就還信用卡數，尚且有咁遭遇，若過去有拖欠信用卡數的美國人就更加會被銀行大削信用額了。美國是一個借貸消費的社會，借貸收縮，消費自然跟住收縮。
上周零售銷售數據公布後，零售業巨企紛紛捱沽，標普500成分股中28家零售股中，只有一隻逆市上升，平均下挫3.3%；全美第二大的百貨公司Macy公布季度業績輕微低過預期，首季銷售跌9.5%，業績不錯，但其股價亦要下滑。
收樓通知創新高
令投資者更震驚係RealtracInc.公布，美國4月份收樓通知宗數創新高，有超過34.2萬個住宅在4月份收過一次或以上的收樓通知，按年大升32%。即係話，374間住宅中就有1間被收回的可能，係自2005年開始有記錄以來第二個月最高，而3月份收樓通知宗數係34萬間，所謂的「市道轉好」亦未能減少收樓數字。
大城市中，賭城拉斯維加斯情況最差，每56個單位，就有一個接過收樓通知。標普500房地產指數下跌6.6%，係24個行業中，跌幅最大的。房屋建造業股份亦下跌5.7%。
各大機構爭相批股
另外，批股潮湧現，特別係銀行更係批得就批，北卡羅來納州銀行BB&T以每股20美元批7500萬股，集資15億美元。南卡羅來納州銀行SCBTFinancial以每股23元批130萬股，集資3000萬美元。賭業巨企MGM計畫批8100萬股，集資10億美元，另外又會發15億美元的有擔保票據，搵錢去重整債務。
炒經濟復甦，買商品都開始唔得，銅價連日下跌，而據中國於4月恢復其140萬公頓的鋁材生產產能，亦將導致嚴重的過度供應，令鋁價受壓。
環球股市呢一浪上升，主要炒經濟見底及全面復甦，股市升，商品升，美元跌，但而家起碼睇到美國和歐洲情況都唔係咁，英國自己把經濟回復正增長的時期推遲到明年第一季，美國的消費和樓市的情況仍然令人憂慮，相信美股亦要調整一下啦。